მთავარი ყველა სიახლე თბილისი ლიტერატურულ ფორუმს მასპინძლობს

თბილისი ლიტერატურულ ფორუმს მასპინძლობს

25 იანვარი, 2018

ქართული წიგნის ეროვნული ცენტრის მოწვევით, თბილისს წამყვანი ევროპული ქვეყნების გამომცემლები, საავტორო უფლებების მენეჯერები და ლიტერატურის აგენტები სტუმრობენ. გერმანელი, ფრანგი, ბრიტანელი, იტალიელი, ჰოლანდიელი, პოლონელი და თურქი გამომცემლები ცენტრის ორგანიზებულ რიგით მერვე ლიტერატურულ ფორულ-დიალოგს ესწრებიან, რომელიც დღეს ცენტრის დირექტორმა მედეა მეტრეველმა გასხნა. უცხოელ სტუმრებს ქართულ ლიტერატურაში მიმდინარე პროცესები ლიტერატურის კრიტიკოსებმა დავთ გაბუნიამ და გაგა ლომიძემ გააცნეს. ვიზიტი 2018 წელს ფრანკფურტის წიგნის ბაზრობაზე საქართველოს საპატიო სტუმარი ქვეყნის პროექტის ფარგლებში ხორციელდება. 


ოთხი დღის განმავლობაში 15-მდე მსხვილი და მნიშვნელოვანი უცხოური გამომცემლობის (Éditions de l'Olivier, Gallimard, Penguin Random House/Vintage, Metailie Publishing House, Edition Monhardt, Leipziger Literaturverlag, Iperborea, Karakter, Foksal, Feltrinelli Publishing, Prometheus, Eccles Fisher Associates, Ajans Letra, Dirk Hülstrunk - Poetry Curator) წარმომადგენელი ქართველ კოლეგებთან, მწერლებთან, მთარგმნელებთან, კრიტიკოსებთან და ლიტერატურის აგენტებთან ერთად ქართული მხატვრული და არამხატვრული ლიტერატურის უცხოურ ენებზე თარგმნის პროცესზე, საზღვარგარეთ პოპულარიზაციასა და ქართული წიგნის ინდუსტრიის განვითარებაზე ისაუბრებენ. 

ევროპელი სტუმრები ქართველ კოლეგებთან პირისპირ შეხვედრებზე ფრანკფურტის წიგნის ბაზრობაზე საქართველოს საპატიო სტუმარი ქვეყნის ლიტერატურული პროგრამის ფარგლებში სხვადასხვა შინაარსისა და ფორმატის, მათ შორის, ლირიკული კომპონენტებით დატვირთული ერთობლივი ღონისძიებების დაგეგმვა-განხორციელების პერსპექტივებსა და კონკრეტული ლიტერატურული ნაწარმოებების საავტორო უფლებების გაყიდვის საკითხებზე იმსჯელებენ. 

უცხოური გამომცემლობებისა და ლიტერატურული სფეროს წარმომადგენლები სამუშაო სესიების, პრეზენტაციებისა და დისკუსიების ფორმატში ქართული წიგნის ეროვნული ცენტრის ხელმძღვანელს და სხვადასხვა კულტურულ-ლიტერატურული ინსტიტუციის წარმომადგენელს შეხვდებიან. სპეციალური კულტურული პროგრამის ფარგლებში კი სახელოვნებო და სამეცნიერო ცენტრებსა და მუზეუმებში დაცულ უნიკალურ კოლექციებს, მათ შორის, ეროვნული მუზეუმის ოქროს ფონდს, ეროვნულ გალერეას მოინახულებენ. 

ქართული წიგნის ეროვნული ცენტრის მიზანია, მსგავსი პროექტებით ხელი შეუწყოს ქართული ლიტერატურის უცხოენოვანი თარგმანების რაოდენობრივ ზრდას და ქართველი ავტორების საზღვარგარეთ პოპულარიზაციას; ქართულ საგამომცემლო სფეროში სხვადასხვა პროფესიის განვითარებას; ქართველი გამომცემლების, ლიტერატურული აგენტების, მთარგმნელებისა და კრიტიკოსების პროფესიული უნარ-ჩვევების განვითარებასა და უცხოელ კოლეგებთან საქმიანი თანამშრომლობის ჩამოყალიბებას. 

2018 წლის ლიტერატურული ფორუმ-დიალოგის მხარდამჭერი ორგანიზაციებია: საქართველოს კულტურისა და სპორტის სამინისტრო, თბილისის გოეთეს ინსტიტუტი, ფრანგული ინსტიტუტი საქართველოში, პოლონეთის საელჩო საქართველოში, საქართველოს მწერალთა სახლი, საქართველოს ეროვნული მუზეუმი და საქართველოს პარლამენტის ეროვნული ბიბლიოთეკა.

ყველა სიახლე